CLAUSURA DO OBRADOIRO DE EMPREGO “RESERVA DA BIOSFERA: EMPREGO NO RURAL”

Clausura do Obradoiro de Emprego Reserva de Biosfera: Emprego no Rural

Este pasado 1 de agosto tivo lugar o acto de clausura do obradoiro de emprego “Reserva de Biosfera: Emprego no Rural” que, nas especialidades de fruticultura e produción de sementes, proporcionou emprego e formación a un total de 20 persoas durante os nove meses nos que se desenvolveu.

Este acto, presidido polo alcalde de Abegondo José Antonio Santiso,  contou coa presenza do delegado provincial da Xunta, Ovidio Rodeiro, do xefe territorial de Economía e Emprego Isidoro Martínez, da alcaldesa de Bergondo Alejandra Pérez, da concelleira de Betanzos Mª Jesús Regueiro, do alcalde de Carral Javier Gestal, da concelleira de Coirós Yolanda Valiño, do Alcalde de Oza-Cesuras Pablo Cacheiro e do alcalde de Paderne César Longo.

Con un presuposto total de 315.272,27 € cofinanciados pola Xunta de Galicia, os seus integrantes, ademais de formarse en actividades de conservación e mellora do medio ambiente, coñeceron un pouco máis dos valores que representa este territorio, Reserva de Biosfera, do que forman parte.

Os alcaldes de Abegondo e Paderne que ostentan a Presidencia e Vicepresidencia, respectivamente, da Reserva de Biosfera Mariñas Coruñesas e Terras do Mandeo, xunto cos rexedores dos concellos limítrofes, están a loitar por defender a riqueza do territorio buscando ferramentas útiles ós seus habitantes a través estas e outras iniciativas que axuden a crear postos de traballo na zona.