As Mariñas Coruñesas, presente por primeira vez no Congreso Estatal de Ecoturismo

A Reserva expón o seu traballo coa marca de calidade e busca apoios para converterse no primeiro destino con esta certificación en Galicia

A Reserva de Biosfera Mariñas Coruñesas e Terras do Mandeo foi invitada ao Congreso Estatal de Ecoturismo, sendo a primeira vez que participa. Trátase do principal encontro a nivel España de destinos ecoturísticos.

A cita está  a ter lugar en Guadix, Sierra Nevada. Participan César Longo, vicepresidente da Reserva de Biosfera, e Diego López, técnico da Reserva  e xestor do SICTED. Expoñen os traballos innovadores que se están a realizar co enfoque de aglutinar a Marca da Reserva de Biosfera coa metodoloxía SICTED do Ministerio de Industria, Turismo e Comercio.

Coa participación no congreso, preténdese sumar apoios para conseguir que Mariñas Coruñesas sexa o primeiro Destino de Galicia certificado en Ecoturismo, o que suporá un antes e despois para os produtos e empresas do territorio.

A Reserva coruñesa recibiu este ano 2019 o Premio Michel Batisse de entre as 701 Reservas que existen a nivel internacional, e foi a primeira Reserva de Biosfera a nivel mundial de adherir a empresas a unha Marca Estatal de Reservas de Biosfera. Agora apóstase por ser a primeira Reserva que aproveite a Marca da Reserva de Biosfera e o Sicted para certificar en calidade e acadar un posicionamento como un auténtico destino de Ecoturismo, no que se potencie a colaboración público-privada para o artellamento do destino turístico.

César Longo Queijo (Vicepresidente da R.B.); Montserrat Fernández San Miguel, Directora Adxunta do Organismo Autónomo Parques Nacionales que coordina a Red Española de Reservas de Biosfera; Ricardo Blanco Portillo, Jefe da Área de Turismo Sostenible da Subdirección General de Desarrollo y Sostenibilidad Turística, Secretaria de Estado de Turismo); Diego López Pedreira (Técnico da R.B. e xestor SICTED do destino).